Usalama wa WhatsApp
Faragha na Usalama vipo kwenye damu yetu
Toka siku ya kwanza, tumebuni WhatsApp ili kukusaidia kuwasiliana na marafiki, kushiriki taarifa muhimu wakati wa majanga ya asili, kuungana na wanafamilia mliopoteana, au kutafuta maisha mazuri. Baadhi ya matukio ya binafsi zaidi katika maisha yako hushirikishwa kwa kutumia WhatsApp, ndiyo maana tumebuni ufumbaji wa mwisho hadi mwisho kwenye programu yetu. Kwa kutumia ufumbaji wa mwisho hadi mwisho, ujumbe, picha, video, ujumbe wa sauti, nyaraka, na simu zako hulindwa ili zisiingie kwenye mikono isiyofaa.
Utumaji Ujumbe wa Binafsi
Mfumo wa WhatsApp wa ufumbaji wa mwisho hadi mwisho hutumika unapomtumia ujumbe mtu mwingine anayetumia WhatsApp Messenger. Ufumbaji wa mwisho hadi mwisho huhakikisha kuwa ni wewe tu na mtu unayewasiliana naye mnaweza kusoma au kusikiliza ujumbe unaotumwa, na kwamba hakuna yeyote katikati, hata WhatsApp yenyewe. Hii ni kwa sababu kwa kutumia ufumbaji wa mwisho hadi mwisho, ujumbe wako hulindwa kwa kufuli, ni wewe na mpokeaji pekee ndio mlio na ufunguo maalum wa kuufungua na kusoma ujumbe huo. Haya yote hufanyika kiotomatiki: hakuna haja ya kuwasha mipangilio au kupanga soga maalum za siri ili kudumisha usalama wa ujumbe wako.
Utumaji Ujumbe wa Kibiashara
Kila ujumbe wa WhatsApp hulindwa na itifaki ile ile ya ufumbaji wa Signal ambao hudumisha usalama wa ujumbe kabla haujatoka kwenye kifaa chako. Unapotuma ujumbe kwenda kwenye akaunti ya biashara ya WhatsApp, ujumbe wako huwasilishwa kwa usalama kwenda sehemu iliyochaguliwa na biashara hiyo.
WhatsApp inachukulia kwamba soga kati yako na biashara zinazotumia programu ya WhatsApp Business au zinazosimamia na kujihifadhia ujumbe wa wateja huwa zimefumbwa mwisho hadi mwisho. Mara tu ujumbe ukishapokelewa, utakuwa chini ya desturi za faragha za biashara husika. Biashara hiyo inaweza kuwapa idadi fulani ya wafanyakazi, au hata mashirika mengine, jukumu la kuchakata na kujibu ujumbe.
Baadhi ya biashara1 zitaweza kuchagua kampuni kuu ya WhatsApp, ambayo ni Facebook, ili ihifadhi ujumbe kwa usalama na kujibu wateja. Unaweza kuwasiliana na biashara husika wakati wowote ili upate maelezo zaidi kuhusu desturi zake za faragha.
Malipo
Malipo ya WhatsApp, ambayo yanapatikana kwenye nchi zilizochaguliwa, yanawezesha uhamishaji kati ya akaunti kwenye taasisi za kifedha. Kadi na namba za benki zinahifadhiwa zikiwa zimefumbwa kwenye mtandao wenye usalama sana. Hata hivyo, kwa kuwa taasisi za kifedha haziwezi kushughulikia miamala bila kupokea taarifa zinazohusiana na malipo haya, malipo haya hayakufumbwa kwa ufumbaji wa mwisho hadi mwisho.
Udhibiti ni wako
WhatsApp inataka kuhakikisha kuwa unaelewa kinachofanyika kwa ujumbe wako. Ikiwa hutaki kupokea ujumbe kutoka kwa mtu au biashara, unaweza kumzuia moja kwa moja kwenye soga au umfute kutoka kwenye orodha ya unaowasiliana nao. Tunataka kuhakikisha kuwa unaelewa jinsi ujumbe wako unavyoshughulikiwa na kwamba una hiari unazohitaji kufanya uamuzi unaokufaa.
Soma ufafanuzi wa kina wa kiufundi kuhusu ufumbaji wa mwisho hadi mwisho wa WhatsApp ulioundwa kwa ushirikiano na Open Whisper Systems. Angalia muhtasari wa hati yetu rasmi ya kiufundi inayoelezea uboreshaji wa hivi karibuni ulioanzishwa kwenye mchakato wetu wa ufumbaji kama sehemu ya toleo la beta la vifaa vingi.
Angalia Ushauri wa Usalama ili upate taarifa za mara kwa mara za usalama.
1 Mwaka wa 2021.