Siguria e WhatsApp
Privatësia dhe siguria janë në ADN-në tonë
Që nga dita e parë, ne e ndërtuam WhatsApp për të të ndihmuar të qëndrosh në kontakt me shokët, të ndash informacione jetike gjatë katastrofave natyrore, të rilidhesh me familjet e ndara, ose të kërkosh një jetë më të mirë. Disa nga momentet e tua më personale ndahen me WhatsApp dhe kjo është arsyeja pse ne e kemi integruar enkriptimin nga skaji në skaj në aplikacionin tonë. Kur janë të enkriptuara nga skaji në skaj, mesazhet, fotografitë, videot, mesazhet zanore, dokumentet dhe telefonatat e tua janë të siguruara që të mos bien në duar të gabuara.
Mesazhet personale
Enkriptimi nga skaji në skaj i WhatsApp përdoret kur i dërgon mesazh një personi tjetër duke përdorur WhatsApp Messenger. Enkriptimi nga skaji në skaj siguron që vetëm ti dhe personi me të cilin po komunikon mund t’i lexoni ato që dërgohen dhe askush tjetër mes jush, as edhe WhatsApp. Kjo ndodh sepse me enkriptimin nga skaji në skaj, mesazhet e tua janë të siguruara me një kyç dhe vetëm marrësi dhe ti e keni çelësin e veçantë që nevojitet për t’i shkyçur dhe lexuar ato. Të gjitha këto ndodhin automatikisht: nuk ka nevojë të aktivizosh parametra ose të konfigurosh biseda të veçanta sekrete për t’i siguruar mesazhet e tua.
Mesazhet e biznesit
Çdo mesazh i WhatsApp mbrohet nga i njëjti protokoll i enkriptimit të sinjalit që i siguron mesazhet para se të largohen nga pajisja jote. Kur dërgon mesazh te një llogari biznesi të WhatsApp, mesazhi yt dërgohet në mënyrë të sigurt në destinacionin e zgjedhur nga biznesi.
WhatsApp i konsideron bisedat me bizneset që përdorin aplikacionin WhatsApp Business ose që i menaxhojnë dhe i ruajnë vetë mesazhet e klientëve, si të enkriptuara nga skaji në skaj. Pasi të merret mesazhi, ai do të jetë objekt i praktikave të privatësisë së biznesit. Biznesi mund të caktojë një numër punonjësish, ose edhe shitës të tjerë, për përpunimin dhe përgjigjen ndaj mesazhit.
Disa biznese1 do të mund të zgjedhin Facebook, kompaninë mëmë të WhatsApp, për t'i ruajtur në mënyrë të sigurt mesazhet dhe për t'iu përgjigjur klientëve. Mund të kontaktosh gjithmonë me atë biznes për të mësuar më shumë për praktikat e tij të privatësisë.
Pagesat
Pagesat në WhatsApp, të cilat janë të disponueshme në shtete të zgjedhura, bëjnë të mundur transferta mes llogarive në institucionet financiare. Numrat e kartave dhe të bankave ruhen si të enkriptuar dhe në një rrjet mjaft të sigurt. Sidoqoftë, duke qenë se institucionet financiare nuk mund t’i përpunojnë transaksionet pa marrë informacionet në lidhje me këto pagesa, këto pagesa nuk janë të enkriptuara nga skaji në skaj.
Ti ke kontrollin
WhatsApp dëshiron të sigurohet që ti e di se çfarë po ndodh me mesazhet e tua. Nëse nuk dëshiron të marrësh mesazhe nga një person ose biznes, mund ta bllokosh gjithmonë atë drejtpërdrejt nga biseda ose ta fshish atë nga lista jote e kontakteve. Ne dëshirojmë të sigurohemi që ti e kupton se si trajtohen mesazhet e tua dhe se ke opsionet që të duhen për të marrë vendimet e duhura për ty.
Fol lirshëm
Telefonatat me WhatsApp të lejojnë të flasësh privatisht me shokët dhe familjen tënde, edhe nëse janë në një shtet tjetër.
Mesazhet që qëndrojnë me ty
Mesazhet me enkriptimin nga skaji në skaj ruhen në pajisjen tënde dhe jo në serverët e WhatsApp pasi të dërgohen.
Shikoje vetë
WhatsApp të lejon të kontrollosh nëse telefonatat që bën dhe mesazhet që dërgon janë të enkriptuara nga skaji në skaj. Thjesht kërko për treguesin në bisedë ose tek informacionet e kontaktit ose të biznesit.
Merr detajet
Lexo një shpjegim të detajuar teknik të enkriptimit nga skaji në skaj të WhatsApp, i zhvilluar në bashkëpunim me Open Whisper Systems. Qasju një versioni paraprak të udhëzuesit tonë teknik i cili mbulon përmirësimet e fundit të enkriptimit tonë, i prezantuar në kuadër të versionit beta në shumë pajisje.
Kontrollo Këshillat e sigurisë për përditësime të rregullta mbi sigurinë.
1 Në 2021.