ਜਦੋਂ ਤੁਸੀਂ ਕਿਸੇ ਨੂੰ WhatsApp ਉੱਤੇ ਸੁਨੇਹਾ ਭੇਜਦੇ ਹੋ, ਉਦੋਂ WhatsApp ਦੀ ਸਿਰੇ-ਤੋਂ-ਸਿਰੇ ਤੱਕ ਇੰਕ੍ਰਿਪਸ਼ਨ ਕੰਮ ਕਰਦੀ ਹੈ। ਕਈ ਮੈਸੇਜਿੰਗ ਐਪਾਂ, ਸਿਰਫ਼ ਆਪਣੇ ਅਤੇ ਤੁਹਾਡੇ ਵਿਚਕਾਰ ਹੀ ਸੁਨੇਹਿਆਂ ਨੂੰ ਇੰਕ੍ਰਿਪਟ ਕਰਕੇ, ਅਧੂਰੀ ਸੁਰੱਖਿਆ ਪ੍ਰਦਾਨ ਕਰਦੀਆਂ ਹਨ, ਪਰ WhatsApp ਦੀ ਸਿਰੇ-ਤੋਂ-ਸਿਰੇ ਤੱਕ ਇੰਕ੍ਰਿਪਸ਼ਨ ਇਹ ਪੱਕਾ ਕਰਦੀ ਹੈ ਕਿ ਸਿਰਫ਼ ਚੈਟ ਵਿੱਚ ਮੌਜੂਦ ਵਿਅਕਤੀ ਹੀ ਭੇਜੇ ਗਏ ਸੁਨੇਹਿਆਂ ਨੂੰ ਪੜ੍ਹ ਸਕਣ ਅਤੇ ਉਹਨਾਂ ਤੋਂ ਇਲਾਵਾ ਕੋਈ ਵੀ ਬਾਹਰੀ ਵਿਅਕਤੀ ਉਹਨਾਂ ਨੂੰ ਪੜ੍ਹ ਨਾ ਸਕੇ, ਇੱਥੋਂ ਤੱਕ ਕਿ WhatsApp ਵੀ ਨਹੀਂ। ਇਹ ਇੰਕ੍ਰਿਪਸ਼ਨ ਤੁਹਾਡੇ ਸੁਨੇਹਿਆਂ ਨੂੰ ਇੱਕ ਕਿਸਮ ਦਾ ਤਾਲਾ ਲਗਾ ਕੇ ਪ੍ਰਦਾਨ ਕੀਤੀ ਜਾਂਦੀ ਹੈ, ਅਤੇ ਇਸ ਤਾਲੇ ਨੂੰ ਖੋਲ੍ਹਣ ਦੀ ਖਾਸ ਚਾਬੀ ਸਿਰਫ਼ ਤੁਹਾਡੇ ਕੋਲ ਅਤੇ ਸੁਨੇਹਾ ਪ੍ਰਾਪਤ ਕਰਨ ਵਾਲੇ ਕੋਲ ਹੀ ਹੁੰਦੀ ਹੈ। ਸੁਰੱਖਿਆ ਨੂੰ ਹੋਰ ਵਧਾਉਣ ਲਈ, ਤੁਹਾਡੇ ਦੁਆਰਾ ਭੇਜੇ ਗਏ ਹਰ ਸੁਨੇਹੇ ਦਾ ਆਪਣਾ ਵੱਖਰਾ ਤਾਲਾ ਅਤੇ ਵੱਖਰੀ ਚਾਬੀ ਹੁੰਦੀ ਹੈ। ਇਹ ਸਭ ਸਵੈਚਾਲਿਤ ਹੁੰਦਾ ਹੈ: ਆਪਣੇ ਸੁਨੇਹਿਆਂ ਨੂੰ ਸੁਰੱਖਿਅਤ ਰੱਖਣ ਲਈ ਤੁਹਾਨੂੰ ਕੋਈ ਵੀ ਸੈਟਿੰਗ ਚਾਲੂ ਕਰਨ ਜਾਂ ਕੋਈ ਗੁਪਤ ਚੈਟ ਸ਼ੁਰੂ ਕਰਨ ਦੀ ਲੋੜ ਨਹੀਂ ਪੈਂਦੀ ਹੈ।

ਕਈ ਦੇਸ਼ਾਂ ਵਿੱਚ WhatsApp ਪੇਮੈਂਟ ਫੀਚਰ ਉਪਲਬਧ ਹੈ, ਇਹ ਫੀਚਰ ਤੁਹਾਨੂੰ ਬੈਂਕ ਖਾਤਿਆਂ ਵਿਚਕਾਰ ਪੈਸੇ ਟ੍ਰਾਂਸਫਰ ਕਰਨ ਦੀ ਸਹੂਲਤ ਦਿੰਦਾ ਹੈ। ਤੁਹਾਡੇ ਕਾਰਡ ਅਤੇ ਬੈਂਕ ਖਾਤੇ ਦੇ ਨੰਬਰਾਂ ਨੂੰ ਇੰਕ੍ਰਿਪਟ ਕਰਕੇ ਬਹੁਤ ਹੀ ਮਜ਼ਬੂਤ ਅਤੇ ਸੁਰੱਖਿਅਤ ਨੈੱਟਵਰਕ ਉੱਤੇ ਸਟੋਰ ਕੀਤਾ ਜਾਂਦਾ ਹੈ। ਲੇਕਿਨ, ਪੇਮੈਂਟ ਦੇ ਲੈਣ-ਦੇਣ ਨੂੰ ਪੂਰਾ ਕਰਨ ਵਾਸਤੇ, ਬੈਂਕਾਂ ਲਈ ਪੇਮੈਂਟ ਨਾਲ ਸੰਬੰਧਿਤ ਜਾਣਕਾਰੀ ਪ੍ਰਾਪਤ ਕਰਨਾ ਜ਼ਰੂਰੀ ਹੁੰਦਾ ਹੈ, ਇਸ ਲਈ ਪੇਮੈਂਟਾਂ ਸਿਰੇ-ਤੋਂ-ਸਿਰੇ ਤੱਕ ਇੰਕ੍ਰਿਪਟਿਡ ਨਹੀਂ ਹੁੰਦੀਆਂ ਹਨ।