Fokusi ynë kryesor në WhatsApp është t'u japim tre miliardë përdoruesve në të gjithë botën mundësinë të komunikojnë në mënyrë private. Ndërkohë që aplikacioni ynë zhvillohet për të mbështetur gjithashtu mesazhet e biznesit, Kanalet dhe Meta AI, po iu përgjigjemi disa pyetjeve të zakonshme se si funksionojnë këto veçori dhe se si vazhdojmë të ndërtojmë mbi vitet e punës për të mbrojtur privatësinë tënde.
Jo, ne nuk mund t'i shikojmë mesazhet e tua personale, pavarësisht nëse janë midis dy personave ose në bisedat në grup me shokët, familjen, shokët e klasës ose me persona të tjerë. Ne i mbrojmë këto mesazhe me enkriptimin nga skaji në skaj, duke përdorur protokollin Signal, i cili i siguron mesazhet e tua para se të largohen nga pajisja jote. Kjo do të thotë se askush jashtë bisedës, madje as WhatsApp ose Meta, nuk mund t'i lexojë, t'i dëgjojë ose t'i ndajë ato. Mund të mësosh më shumë se si funksionon enkriptimi nga skaji në skaj këtu.
Ekzistojnë disa ndryshime kur vjen puna për mesazhet e biznesit dhe Meta AI, të cilat do t'i shpjegojmë më poshtë.
Duke marrë parasysh se si funksionojnë bizneset, ne në WhatsApp bëjmë një dallim midis mesazheve personale dhe atyre me bizneset. Në vend që të dërgojnë mesazhe nga një celular, bizneset kanë shpesh operacione më të ndërlikuara, të cilat bëjnë të mundur që shumë njerëz, si dhe mbështetja e klientit me IA-në, t'u përgjigjen pyetjeve të klientëve. Ato kanë gjithashtu nevojë për një vend për të ruajtur dhe për t'iu përgjigjur mesazheve.
Shumë biznese zgjedhin Meta si ofruesin e tyre të hapësirës ruajtëse në renë kompjuterike. Për këtë arsye, ne nuk i konsiderojmë këto mesazhe si të enkriptuara nga skaji në skaj.
Ne i kemi ndërtuar këto zgjidhje sepse njerëzit dëshirojnë të komunikojnë me bizneset në WhatsApp dhe ajo është një alternativë më e shpejtë dhe më private se emaili ose telefonatat.
Mos harroni se kur komunikoni me një biznes, ai mund t'i përdorë informacionet që i jepni për qëllimet e veta të marketingut, të cilat mund të përfshijnë, për shembull, reklamimin në Meta. Kur një biznes po përdor shërbimet e Meta, të shfaqim një mesazh blu të sistemit brenda bisedës, që të mund të mësosh më shumë.
Ne nuk mund ta shikojmë përmbajtjen e mesazheve personale sepse ato janë të enkriptuara nga skaji në skaj. Përveç kësaj, ne nuk mbajmë regjistrime se kujt po i dërgon mesazhe ose po i telefonon gjithsecili. Ne mendojmë se mbajtja e të dhënave individuale për tre miliardë përdorues do të ishte e dëmshme për privatësinë dhe ne nuk e bëjmë këtë.
Ne e kemi aftësinë të kuptojmë se si po përdoren veçoritë tona që të mund të vazhdojmë t'i përmirësojmë ato dhe synojmë t'i heqim të dhënat personale kur e bëjmë këtë. Ne kemi ndërtuar teknologjinë që heq të dhënat personale, të cilat mund të lidhen me një person ose me një numër specifik telefoni siç shpjegohet këtu.
Ne punojmë gjithashtu për të zbuluar përmbajtjen e bezdisshme nëpërmjet sistemeve të përparuara të automatizuara dhe raportimeve. Për shembull, një përdorues që dërgon 1000 mesazhe në minutë ka mundësi të jetë një llogari për përmbajtjen e bezdisshme të automatizuar dhe ne duhet ta përjashtojmë atë që të mos përdorë WhatsApp. Në raste të tilla abuzimi, ne kemi aftësinë të shikojmë se kush po i dërgon mesazhe kujt sapo identifikohet një problem.
Për arsye se kemi këtë aftësi, ne marrim ndonjëherë urdhra ligjorë për të dhënë këto informacione. Ne jemi transparentë për mënyrën se si iu përgjigjemi kërkesave të vlefshme nga autoritetet e zbatimit të ligjit dhe mund të mësosh më shumë këtu.
Ne nuk mund t'i shikojmë mesazhet e dërguara në grupet me shokët dhe familjen sepse edhe ato janë të enkriptuara nga skaji në skaj.
Ne e dimë se cilat numra telefoni i përkasin cilit grup që të mund t'i dorëzojmë mesazhet në vendin e duhur. Ne dimë gjithashtu emrin, përshkrimin dhe fotografinë e profilit të grupit nëse ekziston një i tillë. Ne i përdorim këto informacione për të përjashtuar grupet që mendojmë se po përfshihen në aktivitete abuzive, të tilla si ndarja e materialeve me abuzim seksual të fëmijëve. Mund të mësosh më shumë këtu.
Ne mbështetemi në adresën IP dhe në numrin tënd të telefonit për të llogaritur me afërsi vendndodhjen tënde të përgjithshme (jo të përpiktë), si p.sh. shtetin ose qytetin, për të mundësuar veçoritë e tilla si pagesat ose për të respektuar ligjet dhe rregulloret lokale.
Përveç kësaj, ti ke munësinë të ndash vendodhjen tënde të vërtetë, të përpiktë, me të tjerët në një bisedë. Kjo veçori mbështetet në vendndodhjen tënde të vërtetë sipas GPS-së dhe ajo mbrohet me enkriptimin nga skaji në skaj, në mënyrë që as WhatsApp, as Meta, të mos mund ta shikojë atë.
Me enkriptimin nga skaji në skaj, askush nuk mund t'i shikojë mesazhet e tua personale, duke përfshirë WhatsApp dhe Meta. Ne mbështetemi në teknologjinë e Meta për të mbështetur njerëzit në të gjithë botën me shërbime të shpejta dhe të besueshme, por qasja në të dhënat personale të WhatsApp është e kufizuar që ato të mos mund të përdoren nga aplikacionet e tjera të Meta - këtu përfshihen reklamat - nëse nuk janë për njërin nga tre qëllimet specifike: 1) për të përcaktuar se sa personave po u shërbejmë, dhe e bëjmë këtë sepse jemi një kompani publike dhe duhet ta raportojmë këtë informacion; 2) për të ndihmuar që t'i mbajmë njerëzit të sigurt, gjë e cila mendojmë se është e rëndësishme; dhe 3) për të të ofruar veçori opsionale, të tilla si pagesat, Meta AI ose Qendra e llogarive që funksionojnë nëpër produktet e Meta. Mund të mësosh më shumë këtu.
Nëse dëshiron, mund ta shtosh llogarinë tënde të WhatsApp në një Qendër llogarish me një llogari ekzistuese të Facebook ose Instagram. Kjo është një veçori opsionale që mundëson eksperiencat e lidhura nëpër aplikacione. Duke lidhur llogaritë e tua, mund të ndash me lehtësi Statusin tënd të krijuar në WhatsApp te Historitë në Facebook ose Instagram dhe mund ta personalizosh më tej Meta AI me informacionet që ke ndarë me ato aplikacione. Aplikacionet e tjera të Meta do të marrin informacione rreth teje për të mundësuar këto eksperienca. Por përsëri, mesazhet dhe telefonatat e tua personale mbeten të enkriptuara nga skaji në skaj dhe nuk përdoren për reklama.
Njerëzit janë me të vërtetë të emocionuar për të eksperimentuar dhe për të eksploruar mundësitë e Meta AI, dhe WhatsApp është një nga mënyrat më të mirënjohura me të cilën njerëzit po angazhohen me IA-në në të gjithë botën. Përdorimi i Meta AI është plotësisht opsional në WhatsApp. Duhet të bësh një veprim për të filluar bashkëbisedimin, duke hapur një bisedë ose duke i dërguar IA-së një mesazh. Nëse zgjedh të bisedosh me Meta AI, drejtpërdrejt ose në grupet e tua, atëherë Meta merr ato që ti ose të tjerët i dërgoni. Përsëri, mesazhet e tua personale janë të enkriptuara nga skaji në skaj dhe nuk shikohen nga Meta AI.
Mund ta përdorësh WhatsApp pa u angazhuar asnjëherë me Meta AI, kështu që ajo nuk do të dijë asgjë. Por pasi të fillosh t'i dërgosh Meta AI mesazhe, atëherë ajo mëson ato që i dërgon, njëlloj me ato që mund t'i dërgosh në mesazh një personi ose biznesi. Duhet t'i dërgosh Meta AI vetëm ato gjëra për të cilat ti ndihesh mirë që ajo t'i kujtojë. Meta AI është "aktive" vetëm kur zgjedh t'i dërgosh mesazhe dhe vetëm ti ose një pjesëmarrës i grupit mund ta filloni këtë, jo Meta ose WhatsApp. Ne kemi ndërtuar shumë kontrolle privatësie për ata që dërgojnë mesazhe te Meta AI. Mund të mësosh më shumë këtu.
Përveç kësaj, ne jemi nismëtarë të mënyrës se si mund t'i përdorin njerëzit funksionalitetet e IA-së në një mënyrë që e ruan privatësinë për të dërguar përmbledhje të dobishme të mesazheve të tyre, si dhe mjetet e tjera të IA-së, pa lejuar që WhatsApp ose Meta t'i lexojë ato.
Nëse e përdor WhatsApp vetëm për t'u dërguar mesazh shokëve dhe familjes, atëherë nuk do të shikosh reklama. Nëse përdor skedën Përditësimet, do të të tregojmë Kanalet e promovuara, si dhe bizneset që mund t'u dërgosh mesazhe, të cilat vendosin Reklama te Statusi. Në këtë rast, informacionet e përdorura për të shfaqur reklama mbështeten në informacione të kufizuara, të tilla si shteti ose qyteti yt, gjuha, kanalet që ndjek dhe se si ndërvepron me reklamat që shikon. Nëse zgjedh të lidhësh llogarinë tënde të WhatsApp me Facebook dhe Instagram, ne përdorim gjithashtu informacionet e atjeshme. Mesazhet e tua personale janë krejtësisht të paarritshme nga çdo gjë që ka lidhje me reklamat. Mund të mësosh më shumë këtu.
Jo, ne nuk i dëgjojmë. Mesazhet, telefonatat dhe statuset e tua personale janë të enkriptuara nga skaji në skaj. As WhatsApp, as Meta nuk mund t'i shikojnë ose t'i dëgjojnë ato, dhe ne nuk i përdorim ato për të të shfaqur reklama.
Po, është thelbësore për misionin tonë që të mbrojmë të drejtën e njerëzve për bashkëbisedime private. Ne kemi kundërshtuar qeveritë që janë përpjekur të hyjnë me forcë në sistemet tona ose të dobësojnë privatësinë nëpërmjet ideve të tjera të këqia, të tilla si "skanimi nga ana e klientit" dhe "gjurmueshmëria".
Përveç kësaj, ekipet tona kanë identifikuar dhe kanë zmbrapsur me sukses sulmet në sistemet dhe përdoruesit tanë dhe ne përpiqemi që t'i bëjmë sulmuesit të mbajnë përgjegjësi. WhatsApp ishte organizata e parë që vuri me sukses para përgjegjësisë një kompani komerciale për softuerë spiunë sipas ligjit të SHBA-së sepse u përpoq të spiunojë pajisjet celulare të njerëzve. Ky ishte një veprim i rëndësishëm për të kërkuar drejtësi dhe për t'u mbrojtur ndaj sulemve të ardhshme, kundër nesh ose kundër kompanive të tjera të teknologjisë.
Ne do të vazhdojmë ta mbrojmë privatësinë tënde.
